大家好，估唔到我係論壇注冊左幾日，平安就成為左小鬥士，真係唔知係咪入錯會啊！ 即刻成為病友(講笑，哈哈)，相反我要好多謝呢度，比我了解到摺耳貓的特性，如果唔係我都唔會以為佢有遺傳病而急去睇醫生，因而早些知到佢有FIP，可以早D幫到佢！ 平安係我地成家人係寵物店揀，因之前想睇美短的，但冇合眼緣，反而一見平安就比佢吸引左，吸引我地的唔係佢對耳，而係佢行為同感覺，因我地未養過貓的，所以好驚貓貓百厭搞破壞，而平安佢動作係斯文優雅的，同埋你同佢講野會喵喵咁應，仲有佢又鐘意伸頭“lam”你，所以我地就冇理佢係乜野品種就帶佢回家！呢D都可能命中注定吧！帶佢走個日佢剛滿4個月，係平安夜日頭，所以我地叫佢平安！ 回家後平安仔真係俘虜曬我地全家，連有少少怕貓嘅太太兩日後都鍚到佢暈，因佢實左太乖懂性啦，我地唔比佢去的地方，佢會停係到諗一諗就掉頭，入房前又會喵你，你叫佢走佢就走，入就入，咁耐都冇破壞過屋企一樣野，真係好好貓一隻！ 冇耐因怕佢係我地返工返學會悶，所以係同一間鋪買多隻3個幾月捲耳貓仔比佢做伴，我地叫佢做“大吉”。大吉的活潑跳躍，同平安的斯文安靜成強烈對比，開頭我地以為性格分別，直到有一次大吉跳高上櫃，而平安上唔到，仲要喵我地幫手，我就懷疑平安有問題，開始上網搵資料仲加多留意佢，亦因此認識到呢度同摺耳貓遺傳病。 好景不常，我入會後兩日就發現平安唔多妥，唔願郁又唔願玩，大吉打佢個頭佢都係避開就算，我以為佢遺傳病發，於是上黎問人！得到你地幫助提供醫生後就約去檢查啦！點知Dr. Angela見到佢就話佢個肚有D脹，要驗驗，抽血時平安好掙扎同惡，我幫手時仲比佢咬左啖添，抽血都抽左15分鐘啊!然後照X光，好彩唔駛麻醉，我就出去等啦。冇耐醫生叫番我入去，就話比我知平安有機會患上冇得醫的FIP， 不過各方跡象都有7成，我個心都打個突，心諗唔係啊!!??另外醫生想抽多少少血同腹水驗清楚， 平安又開始掙扎，我去幫手時見到平安，自己兩行眼淚不斷湧出，一個6呎高麻甩佬流住兩行眼淚幾醜呀！於是我唔幫啦出番去，出去前喊住仲同平安講乖D，醫生幫你！我出去都未坐定，仲同因返緊工要強忍淚水的太太報告平安問題時，助手就拎番平安出黎，助手話佢係我出去後好順攤好乖就抽曬，3分鐘唔駃，聴完我更加激動，太生性啦，但我係男人唔通係度大喊咩！只好強忍入去見醫生，Dr. Angela 解釋腹膜炎係摺耳貓都頗易病發，可能同佢天生較弱有關，另外又談到大吉問題，因佢地一齊生活，所以都大機會受感染，宜家隔離唔係太大功用，另外大吉只要keep住強壯，唔好比佢太大壓迫，都未必病發，咁都安心D！跟住攞埋藥就回家啦，回家途中，得我同平安，就忍唔住喊啦！原來喊住揸車同酒後駕駛都係咁危險，政府應禁止啊！對眼都睇唔到野！！ 返到屋企後，一家3口都係喊住食飯，不過我地亦一致決定係最後今次為平安喊，因我地唔想比佢feel到我地唔開心，比多D正能量佢去打仗！ 諗深一層，其實平安同大家的仔仔囡囡係唔應該出現係世上，就係人類的無知同貪婪，先令到佢地受苦，我都好內疚我嘅無知，令到貓販以為摺耳仲有市場，亦令佢地可能再生多D平安兄弟出來，所以我地要努力宣傳摺耳問題，香港人係現實，你話比佢地聴佢地比錢買嘅貓係有問題，並且可能以後要有漫長同很大的醫療支出時，呢個種就會滯消，冇市場。所以我個人會去D寵物網，見到有人放售摺耳時，打個公開留言，叫人留意摺耳可愛背後的潛在問題，等人買的時候要考慮清楚！ 剛回家的小可愛 獅子王 伏係媽媽肚到玩“抓抓” 扮下人仔先﹣阿凡達啊 [ 本帖最後由 heiheifamily 於 2010-2-7 22:16 編輯 ]

6號個日Dr. Angela 通知我個化驗結果證實係FIP，但係證實唔證實都冇所謂，一早都遇左啦！現在我地都唔傾向用外科方法去治療，因有傷口的話復元仲困難，所以我地會用蘇菁菁係呢度講的天然免疫療法 http://www.oic.hk/index.php?mact ... &cntnt01returnid=60加上台灣果邊的中藥療法以及Dr. Angela 的草藥花藥去治療平安;平安一向都食再我地自己煮的食物再加少量乾糧，自己煮的材料有蒸雞柳、海魚、蝦仁、鴕鳥肉、羊肉、雞肝再加上少量紅蘿蔔及南瓜，加上綜合維他命混合攪到變幼絲，份量配合變化，令到佢食得有新鮮感，增加食慾，所以佢宜家食得都ok，之後我地會比佢食ester-C 維他命同五色靈芝去強化佢自身抵抗力，再加益生菌幫助消化，配合Dr. Angela 的草藥花藥去舒緩佢身體狀況，再加上中藥去消炎利尿去腹水，所以平安要食好多藥，不過佢好聴話食藥，另外都要多謝呢度提供膠囊方法，令到平安餵少幾次藥，希望以上方法幫到平安啦！ 病都要玩下先 食飽飽打仗 我個肚“dum"比細佬當枕頭添 [ 本帖最後由 heiheifamily 於 2010-2-7 22:23 編輯 ]

今日平安唔肯食野，我地好驚以為佢嚴重左，後來先發覺平安原來唔鐘意食鮫魚，因我昨日加左條新鮮鮫魚落去，佢只係食左一餐之後唔食，到我見佢唔食野，轉餐單引佢開口啦，由鮫魚改做雪藏青衣柳，佢即刻開返飯呢!另外平安食左中藥後，腹水冇咁脹實，活動多了，也有跟大吉玩。

天意弄人，當平安稍為好轉時，天氣卻特然轉冷，我地已經開左暖爐，並且加左被比佢，但體弱的平安都逃唔過冷到，今早開始流鼻涕唔食野，不過佢可能太弱啦，佢個身體狀態係幾個鐘內急轉直下，四肢乏力，好辛苦，精神很差，所以我地都唔想再搞佢啦，因為佢係呢段時間都食藥食飯好乖好聴話，但宜家佢好抗拒我地捉佢，可能佢都唔想再捱啦！我地希望就算最後都尊重番佢，係佢身邊陪住佢，同佢傾計，陪佢最後一程，仲記得年三十佢走出廳唔瞓同我地一齊倒數過年，好開心咁，佢仲有食零食添，估唔到兩日後就...........

今早平安走左了，佢等齊我地全家回來，逐一同我地喵左幾下，好似同我地道別咁，然後就慢慢倦着身體，垂下頭，跟住就離開左我地，好在佢一路都行得走得，唔似有太多辛苦，希望平安一路好走，唔駛再被病魔折磨，下世輪迴唔好再做病貓， 雖然佢走左我地都好傷心，但對佢可能亦係種解脫，另外要多謝支持平安的朋友，佢在天之靈都收到你地祝福！

多謝大家對平安的祝福，值得安慰o既係平安走時冇痛苦爭扎，雖然佢可能已經好痛，但起碼冇表現出黎，可能係怕我地難過，仲起得我初二要返工通宵，早上返工前平安精神還可以，有走動，太太傍晚回家時發覺平安已不妥，目光呆滯，鼻口有體液流出，還不斷喵喵叫找人，太太不斷在旁安慰，但太太說平安好像要找我似的，並且堅持拖着身軀要走到大門口趟下，狀似等待我回來，因太太也意識到平安差不多要走，於是太太便在旁不斷鼓勵牠，並要求我早些回來，但可惜我工作關係，無法立刻回家，只好叫平安頂住，期間太太整晚也陪伴平安，並多次叫牠唔好瞓，怕牠一睡不起，好不容易捱到第二日早上，我一收工就立刻飛車回家，一回家開門我就看到平安趟在大門前，我一叫牠，牠立刻大聲回應，不過這次亦係最後聽平安叫啦！牠用盡氣力叫完這聲後，累得頭也抬不起了，看見牠這樣，我立刻去輕摸牠的頭說："乖仔，辛苦你啦！我地係齊你身邊啦！如果你辛苦就走啦，唔好再捱啦！"說罷平安就慢慢垂下頭，慢慢地離開我地！平安係我地第一隻貓，亦係佢令我地愛上貓，係佢抗病過程亦我地學懂好多，對生命到人生看法亦有另一種體會，係工作上我常有機會接觸到生離死別，每次都會亦我明白到人生無常，但估唔到貓生也會無常，看到平安同大家囝囝囡囡努力地生存下去，對比時下動不動輕生的人，真係憤慨莫名，摺耳貓出現係錯誤，動物係有靈性的，但佢地係無法選擇自已命運，當人類努力避免自已下一代免除遺傳病威脅時，我地卻為了利益，不斷為其他物種製造悲劇痛苦，係近來的寵物節，我仲看到有摺耳貓的推廣介紹，有咁多貓展專家係度，我唔信佢到唔知摺耳貓問題，我什至問過一個所謂私人繁殖的貓販摺耳貓問題時，他居然說明知摺耳係會有問題的，不過佢地唔會好難搞喎！仲話佢地唔跳仲好，唔會搞搞振！我當時憤怒到講左D冇口德的說話咒罵佢，我信因果報應的，呢類唯利是圖的商人，必有報應的！順帶一提，記得Dr. angela 睇完平安張X-ray，就話佢唔跳除左fip影響外，其實佢脊骨有D問題的，不過果時已經唔重要，FIP先係頭號敵人，所以就算平安冇FIP，佢都係可能要辛苦一生，所以離去可能亦係解脫！宜家我地希望就係大吉唔會FIP病發，所以佢宜家每天都食補品強壯身體！