尋日係妹妹周年檢查,去年的檢查結果每一樣讀數都好正常,過去一年妹妹keep住食葯,去打過兩針骨膠原,無其他病痛,總括來講都好健康。
尋日本想幫佢驗血,睇o下身體各部份指數好唔好,同埋檢查個心臟。因為我地話想check心臟,Dr. Grace話不如同妹妹做一個全面的身體檢查套餐,包括驗血,照X光,照聲波等。個體檢套餐本來係俾七歲以上狗狗同九歲以上貓貓有八五折優惠,但Dr. Grace好好,雖然妹妹只係6歲,都照俾依個優惠。咁我地就留低妹妹係診所,等佢做好檢查後再返來接佢。
之後同爸爸專程去OIC購物兼食飯,個心一路都記掛住妹豬...好緊張個報告...
3點45分,我地返到診所。Dr. Grace先同我地講解妹妹2張X光片,Dr. Grace話妹妹算好合作,可以唔鎮靜就拍了幾張片。因為妹妹係肉眼都睇到的骨骼病患,所以多年來未針對骨骼問題拍過X光照(以前拍過一張心臟的),尋日係第一次見到佢骨骼的問題。妹妹脊骨共有三個地方有問題,都係生得唔正常,有骨刺,一個係脊骨中間,由果節開始整條脊骨“o羊”了。另一個係尾巴有兩節尾龍骨都係有骨刺。
好在大脾同膝頭關節都正常,而後腳下肢同前掌就有典型的骨骼病徵狀,同脊骨問題一樣都係冇得醫。
睇完X光片就到心電圖,妹妹心臟完全正常,心跳亦都好正常,咁就放下心頭大石o拉...
跟住到驗血報告。有唔係o甘好的消息。Dr. Grace話有兩個唔正常的讀數,鉀爆燈...佢話以妹妹的表現,依個好肯定係失誤,可能部機有問題。另一係鈣好低,由於出現了一個失誤,Dr. Grace話可能鈣的讀數都係失誤,但亦有可能妹妹真係唔夠鈣。我地只有兩個做法,一係用剩底的血送去化驗室化驗,一係過一陣子再帶妹妹去驗血。我地唔想妹妹短時間內抽兩次血,所以選擇將血送去化驗。
心情又再次變得沈重...如果即時有結果,我地可以積極面對,可能要檢討妹妹的餐單,可能要為妹妹補鈣,等待永遠係最磨人...化驗結果要到今個星期中先有,希望真係個驗血機問題,而唔係妹妹有問題。