今朝帶左貓貓去睇周醫生, 佢話雖然粒黑點(sequestrum)係細粒, 但都建議做手術, 因為愈早做始終都好過等惡化先做, 手術費加埋麻醉, 吊鹽水, 驗血, 2次覆診要8k-9k, 周醫生話如果決定做手術, 明天都可以安排俾我, 如果唔考慮做住, 2星期後返來覆診, 目前滴住人造淚水就可以.
唉, 都唔知好唔好同貓貓做手術, 佢成10歲, 我真係好驚麻醉的風險, 我上網睇外國的website, 有d話細的黑點可以靠滴人造淚水等佢自己好番, 但可能要好多個月的時間, 有d都係話做手術可以快d好番, 唔使拖咁耐, 其實貓貓隻眼粒黑點比芝麻細dd, 但圍住黑點側邊有d曚曚地, 而且有d白色的眼屎, 唉, 真係好煩呀, 究竟係咪應該做手術好呀?
今朝由香港仔坐小巴去旺角, 可能路程遙遠, 司機成個賽車手上身開得都好快下, 貓貓好似好唔習慣 (佢之前係去開灣仔睇), 回程返到屋企樓下仲mar大個口仔, 唔知係米熱得滯同口渴, 嚇到我一入屋企即刻俾d水佢飲, 同埋開d風扇吹佢幾秒, 好在好快無事, 仲自己走去食乾糧, 之後我俾個貓草玩具佢玩, 等佢舒服下, 依家瞓到乎乎聲!