已經睇左醫生了
實在太忙了,很久沒有上來update~要講番兩隻仔女睇完醫生既情況先~
十一月五日, 阿肥同阿mui已睇過Dr.Grace, Doris冇介紹錯, 佢真係一個好有醫德既獸醫, 睇兩隻貓睇左差唔多兩個鐘, 之前又提我帶埋supplement同佢地既日用品, 去到逐一介紹成份, 講下對佢地適唔適合, 俾suggest我可以試其他好D和天然既產品同時, 又俾番個話事權我, 唔會硬sale, 十分中肯
先講下阿肥, 唔講唔知, 原來佢個雖然叫”蘇格蘭直耳”, 但都有摺耳既基因. 不過, 佢話呢隻仔其實都好健康, 除左左邊菠蘿蓋有少少鬆, 現階段無必要照X-ray住, 仲有話佢有個肥腩要多做運動-v-“~
到阿mui, 我講左一大輪佢之前既病歷 (1: 曾生個疑似金錢廯 2: 細個時因塊指甲甩左,成半年先好番 3: 已有牙周病 4: 體重不過3kg 5: 近呢幾月,生左粒肉廇仔係隻耳度) 同埋我覺得佢似有骨骼遺傳病. Dr.Grace好pro好有耐性, 逐一檢查佢身體, 粒肉廇仔其實好似人既色玉咁, 無害但有機會增生, 建議下一次洗牙時先一次過做埋切除~而體重佢指係阿mui本身生得細粒, 算正常, 仲話佢有個小啤酒肚要減下tim. 佢亦話mui mui好可能染有冠狀病毒, 因為無可能咁細個就有牙周病, 佢話呢種病毒就好似人生飛滋咁, 主要係黏膜感染, 而感染好大機會都會是因為心理因素所致, 簡單講即係貓貓原來都會因有壓力而生病.我問Dr.Grace咩叫心理因素, 係咪佢成日唔開心就會容易感染, 佢話係, 而且一旦驗左呈陽性, 阿mui壽命將不過3-4歲, 我即刻Down晒, 仲好想喊, 不過佢話只要有適當治療, 例如針對行為性或者可以開一D舒緩既藥, 情況會有所改善. 講到呢度, 有一小插曲, 我同Dr.Grace講,阿mui 係我第一隻親自養既貓, 係香港我同佢相依為命, 原本兩人貓住左一年, 之後因為份工要周圍飛, 然後搬來搬去, 直到搬去男朋友的家, 男友家本身有一隻狗, 一兩個月後又買了肥仔回來, 可能搞到佢唔開心, Dr.Grace聽完驚呼一句, “唔怪得啦, 原本佢係第一位, 而家咩都分薄晒,仲有, 你知唔知貓搬一次屋就等如人類去左月球架” 我話”唔係呱??咁佢而家咪係冥王星?” Dr.Grace笑說”係呀, 所以你要多d錫番佢, 陪下佢,咁佢個心就會定d同開心d” (笑)
到左重點檢查骨骼, Dr Grace 指始終要照一次x-ray 先知問題所在, 我選擇了不麻醉地照, 照個時, 阿mui當然照舊發出劏豬咁聲, 真係勞煩d醫護姐姐了~報告出來, 發現mui mui 的尾巴和左腳都有增生情況, 尾巴就有少少類似骨刺, 而左腳情況比較嚴重, d增生組織較多和重疊, 這一刻真的有愛莫能助的感覺~ 不過佢話情況暫時不算太差, 亦冇波子般嚴重(一開始同Dr.Grace講波子媽介紹, 真的以為mui和未接受治療前的波子一樣, 真係擔心死!!!)
最後醫生開左止痛藥水, 亦叫我慢慢考慮睇下想試邊隻治療方式~
回家食左藥水個幾禮拜, mui子除每次食藥嘔泡外, 還絕食兼在床上大便抗議, 我實在想不到辦法, 所以最近呢半個月已停食藥了.
現在已Book左Dr.Grace, 希望轉打骨膠原針同草本+靈氣治療, 會令佢舒服d之外還容易接受些.
下次睇完醫生, 會再update, 希望大家會祝福和支持mui子啦!
[ 本帖最後由 gothamvera 於 2011-12-4 18:58 編輯 ]